Shu kunlarda Qatar poytaxti Doxa shahrida suv sporti turlari bo‘yicha Jahon chempionati o‘tkazilmoqda.

Ushbu mundialda O‘zbekiston vakili Igor Myalin 10 metr balandlikdan suvga sakrash musobaqasida «Parij-2024» olimpiya o‘yinlarining yo‘llanmasini ham qo‘lga kiritdi.

Yarim final musobaqasida Igorning chiqishi 415.80 ball bilan baholandi va sportchimiz hal qiluvchi final bosqichiga chiqqan 12 nafar sportchi orasida 7-natijaga erishdi.

Reglamentga ko‘ra, 10 metr balandlikdan suvga sakrash musobaqasida final bosqichiga chiqqan 12 nafar sportchi «Parij-2024» olimpiya o‘yinlariga yo‘llanmani naqd qilib qo‘yadi.  

Demak, final musobaqasida medallar uchun kurashni davom ettiradigan hamyurtimiz Igor Myalin bir vaqtning o‘zida Olimpiya o‘yinlariga yo‘llanmani ham qo‘lga kiritdi.

Ma’lumot uchun, bu O‘zbekiston delegasiyasining Parij-2024 Olimpiadasi uchun 18-lisenziyasi bo‘ldi.