Angliya kubogiga xos «sehr-jodu» joriy mavsum ham ishga tushdi: ingliz futboli piramidasidagi Oltinchi divizion vakili «Meydston Yunayted» klubi 1/8 final ishtirokchilari qatoriga qo‘shildi. Diqqat, yarimprofessional jamoa 1/16 final o‘yinini Chempionship peshqadamlaridan biri «Ipsvich» maydonida o‘tkazib, ortga sehrli g‘alaba bilan qaytdi - 2:1. Chinakam mo‘’jiza uchun «Meydston»ga atigi 2ta zarba va to‘p nazorati bo‘yicha 22 foizlik ko‘rsatkich kifoya qildi. Endi klub kubok turniridan tushgan 400 ming funtni yangi maydon barpo etishga yo‘naltiradi.
Tabiiyki, «Meydston»ning «Ipsvich» to‘sig‘idan o‘tishiga hech kim ishonmagandi. Hattoki, mezbon jamoa o‘yinda energiya tejashni lozim topdi, bukmekerlar esa uning g‘alabasiga atigi 1,1 koeffisiyenti bo‘yicha pul qabul qilishdi. «Ipsvich» bosh murabbiyi jumladan, jamoaning joriy mavsumdagi eng samarador futbolchisi - yarim himoyachi Konor Chaplin (9ta gol va 6ta assist)ni zaxirada qoldirdi bamaylixotir. Xullas, hech kimda mezbonlarning osongina g‘alaba qozonishlariga shubha yo‘q edi. To‘g‘ri, Chaplin ikkinchi bo‘limda maydonga tushdi, ammo jamoasiga hech qanday yordam berolmadi. Diqqatga sazovor tomoni, «Meydston Yunayted» o‘z imkoniyatidan to‘liq, 100 foiz foydalandi - butun o‘yin davomida 2ta zarba va 2ta gol! «Ipsvich» futbolchilari esa raqib jamoa darvozasi tomon naq 37 marta zarba yo‘llashdi, to‘p nazorati bo‘yicha 78 foizlik ko‘rsatkich qayd etishdi. Ammo o‘sha oqshom «omad» atalmish sehrli xilqat butunlay Oltinchi divizion ishtirokchisi taraf o‘tib olgandi.
Mana, xG (kutilgan gol) ko‘rsatkichiga qarasangiz, sensasiya kuzatilganiga ishonish mushkul: 3,76ga qarshi 0,85 (ba’zi manbalarda bu boradagi farq 5 baravardan ham ko‘p). Uchrashuvning bosh yulduzi darvozabon Lukas Kovolan naq 12ta «seyv» to‘pladi. «Meydston»ning notanish kiperi «Lester»dan ijara kelishuvi asosida olingan yarim himoyachi Jeremi Sarmiyento zarbasini hisobga olmaganda, qolgan barchasini bartaraf etdi. Kovolan allaqachon 32 yoshni urib qo‘ygan, u vaqtida braziliyalik Filippe Koutinyo bilan 1ta akademiyada tahsil olgan. Darvoqe, braziliyalik ilk marta Milliy liga (Beshinchi divizion) o‘yinining so‘nggi soniyalari «Torki» klubi uchun urgan goli ortidan ko‘zga tashlangan edi. Yarimprofessional jamoadan yana hujumchi Lamar Rey-noldsni alohida maqtash kerak. U sehrli oqshomda 1tadan gol va assist qayd qildi. Bu forvard faoliyati davomida Liga 2 darajasigacha ko‘tarilgan, ammo asosan Beshinchi va Oltinchi divizionda o‘ynamoqda.
Endi ushbu sensasiyaning bir qator ajoyib faktlariga e’tibor qaratamiz:
*** «Meydston» 1977/1978 yillar mavsumidan buyon Oltinchi divizondan Angliya kubogi beshinchi bosqichiga chiqqan birinchi jamoa bo‘ldi. O‘shanda «Blit Spartans» mamlakat kubogi 1/8 finaliga chiqqan va ancha mashhur «Reksem» tomonidan to‘xtatilgandi. Darvoqe, «Spartans» hali ham Oltinchi divizionda (Shimoliy Milliy liga).
*** «Meydston»ning kubok turniridagi sehrli yurishi 2023 yilning 16 sentyabr kuni boshlangan edi. Yarimprofessional futbolchilar 1/8 finalga qadar 6ta raqib to‘sig‘idan o‘tishdi, ular orasida «Ipsvich» eng saviyalisi hisoblanadi. Har holda, «Meydston» bungacha Chempionship vakiliga to‘qnash kelmagandi.
***«Meydston» hozirgi ishtirok ortidan allaqachon 400 ming funtni naqd qildi. Jamoa rahbariyati esa bu mablag‘ni yangi maydon qurishga sarflash haqida qaror qabul qilishga ulgurdi. Shu tariqa kamtarin jamoa endi tabiiy eski maydoni bilan cheklanib qolmaydi. Sun’iy maydon loyihasi bo‘yicha ish boshlanib ketdi.
«Meydston bosh murabbiyi Jorj Elokobi («Vulverxempton»ning sobiq himoyachisi) mo‘’jizaviy o‘yindan keyin o‘z hayratini yashirolmadi, albatta: «Yigitlarga kiyinish xonasida hech narsa qoldirmaslikni tayinladik. Ular shu ko‘rsatmaga amal qilib, maydonda borlarini berishdi. Tabiiyki, hozir har bir shogirdim bilan o‘zgacha faxrlanyapman. Ular oldinga katta qadam tashlashdi. Biz uchun, jamiyatimiz uchun! Hozirgi natijamiz klubning 127 yillik tarixida kuzatilmagan ekan. Bu - tarix. Kubok mo‘’jizasi davom etmoqda». Elokobi yana butun jamoa stadiondan to‘g‘ri qahvaxonaga borishini ham yashirmadi. Albatta, g‘alabani nishonlash uchun!
«Meydston» - yarimprofessional klub. Janub Milliy ligasida ishtirok etuvchi jamoa Kent grafligidagi Meydston shaharchasi sharafini himoya qiladi. Klub 1989-1992 yillar oralig‘ida Futbol ligasi a’zosi bo‘lgan. Biroq keyinchalik inqirozga yuz tutgani oqibatida graflik miqyosidagi To‘rtinchi divizionga qaytgan, yana faqat yoshlar bilan. 2015 yilga kelib, «Meydston» Angliya futbol piramidasiga qayta kirdi. Meydstonliklar bunga qadar shaxsiy stadioni «Gallaxer» qurilishini yakunlagandi. Jamoa oxirgi mavsumlar Beshinchi va Oltinchi divizionlar aro «tebranishmoqda». Hozir esa o‘z ligalari turnir jadvalida 4-bo‘lib turishibdi. Bu pozisiya sohibi yakunda yuqoriga sakrash uchun «pley-off» o‘yinida ishtirok etadi. Beshinchi divizionga to‘g‘ridan-to‘g‘ri chiqish uchun esa jamoa 1-o‘rinni band etishi kerak.
Aytgancha, 28 yanvar kuni Angliya kubogi 1/8 finaliga qur’a tashlandi. «Meydston» bu raundda «Manchester Siti» yoki «Brayton» kabi kuchli klub bilan to‘qnash kelishi mumkin edi. Amalda uning chekiga «Sheffild Uinsdey» - «Koventri» juftligi g‘olibiga qarshi o‘ynash tushdi. Nima derdik, «Meydston» o‘z mo‘’jizasini davom ettirishga urinib ko‘rishi mumkin. Nega endi shunday qilmasligi kerak?
A.ABDUVALIXO‘JAYEV tayyorladi
