"Arsenal" vingeri Markinyos Alenkar tez orada "Fluminense" futbolchisiga aylanadi.

Bu haqda jurnalist Fabrisio Romano X ijtimoiy tarmog‘ida (sobiq Twitter) xabar berdi.

Manba bergan xabarga ko‘ra, Braziliya klubi "kanonirlar" rahbariyati bilan 20 yoshli futbolchini ijaraga olish borasida kelishib olgan.

Futbolchi tibbiy ko‘rikdan muvaffaqiyatli o‘tdi. Kelishuv zarur hujjatlar imzolangandan so‘ng tez orada e’lon qilinadi.

Markinyos 2022 yilda “San-Paulu”dan 3,5 million yevro evaziga “Arsenal”ga o‘tgan edi. Mavsumning birinchi yarmida vinger “Nant” safida ijara asosida o‘ynadi va u barcha turnirlarda yettita to‘liqsiz o‘yin o‘tkazdi.

Futbolchining London klubi bilan shartnomasi 2027 yilning iyun oyi oxirigacha amal qiladi. Transfermarkt internet portaliga ko‘ra futbolchining taxminiy narxi 7 million yevroni tashkil qiladi.