Futbol mavzusini davom ettiramiz. Kecha Parij-2024 yozgi Olimpiya o‘yinlariga yo‘llanma olgan erkaklar jamoalari haqida gaplashgan edik. Bugun ayollar futbolidagi holat haqida fikr yuritamiz.

Olimpiya o‘yinlarining futbol dasturida erkaklar uchun 16 ta, ayollar uchun esa 12 ta joy ajratilgan. Hozirda ayollar jamoalari orasida 5 ta ishtirokchi davlatning nomi ma’lum. Hali yana 4 ta mintaqada saralash bahslari yakunlangani yo‘q. Fevral oyining yakunida Okeaniya, Osiyo va Yevropa, aprel oyida esa Afrika qit’asidan Olimpiadaga boradigan jamoalar nomi aniqlanadi.

Ayollar futboli dasturida hozirgacha lisenziya sohibi bo‘lib ulgurgan jamoalar:

Mezbon: Fransiya;
Markaziy va Shimoliy Amerika: AQSH va Kanada;
Janubiy Amerika: Braziliya, Kolumbiya;

Parij-2024 yozgi Olimpiya o‘yinlarining ayollar futboli dasturida Osiyo mintaqasi uchun 2 ta o‘rin berilgan. Hozirda bu kvotalar uchun 4 jamoa 2 juftlikka bo‘lingan holda raqobat olib boryapti. Xabaringiz bor, Midori Xonda boshchiligidagi O‘zbekiston ayollar terma jamoasi so‘nggi hal qiluvchi bosqichga yetib kelgan bo‘lib, qizlarimiz 24 va 28 fevral kunlari Avstraliyaga qarshi kechadigan uy-safar tizimidagi 2 o‘yin yakuniga ko‘ra Olimpiada chiptalari masalasini hal qilishga harakat qilishadi. Ikkinchi yo‘llanma uchun Yaponiya va KXDR jamoalari o‘zaro kurash olib boradi.

Hozirda Okeaniya mintaqasi uchun saralash musobaqasi o‘tkazilmoqda. 19 fevral kuni g‘alaba qozongan ushbu hudud jamoasi Parijga yo‘l oladi. Shuningdek, 23-28 fevral Yevropa, 24-28 fevral Osiyo va 1-9 aprel kunlari Afrikada so‘nggi lisenziyalarning egalari hal bo‘ladi.

Bir necha kundan keyin qizlarimiz Avstraliyaga qarshi o‘z faoliyatlaridagi eng muhim 2 o‘yinda maydonga tushishadi. Aprel-may oylarida esa Timur Kapadze boshchiligidagi yigitlarimiz Qatar yashil maydonlarida chempionlik va Parij-2024 yo‘llanmalari uchun bahs olib boradilar. Fursatdan foydalanib, har ikki jamoamizga ham bo‘lajak o‘yinlarda omad tilab, yurtimizga Olimpiya o‘yinlarining lisenziyalari bilan qaytib kelishlarini tilab qolamiz.