"Inter" hujumchisi Marko Arnautovich Chempionlar ligasi 1/8 finalida "Atletiko"ga qarshi o‘yinda (1:0) g‘alaba golini urgani haqida gapirdi.
Uchrashuvning 46-daqiqasida avstriyalik futbolchi jarohat olgan Markus Tyuramning o‘rniga maydonga tushgan bo‘lsa, 79-daqiqada Lautaro Martinesning uzatmasidan so‘ng raqib darvozasiga zarba yo‘lladi. Uchrashuv yakunida Arnautovich uchrashuvning eng yaxshi futbolchisi deb topildi.
"Markusga achinaman, jamoadoshim o‘yinni tark etgani unchalik yoqimli emas. Biroq, bu yerda men chiqib, hissa qo‘shishim kerak edi. Muxlislar doim men tomonda bo‘lishgan. Faoliyatimdagi eng muhim gollardan biri deb hisoblagan golni urganim men uchun aql bovar qilmaydigan lahza bo‘ldi. Mening butun oilam shu yerda edi, men juda xursandman.
Bizda fantastik va kuchli jamoa bor va hamma qo‘lidan kelganini qilishga harakat qilmoqda. Endi Madridda yana bir katta o‘yin kutib turibdi: biz u yerga g‘alaba qozonish uchun boramiz", - dedi Arnautovich "Inter" rasmiy saytiga.
Joriy mavsumda 34 yoshli hujumchi 25 ta o‘yin o‘tkazib, 4 ta gol urdi va 3 ta golli uzatmani amalga oshirdi.
Jamoalar o‘rtasidagi javob uchrashuvi 13 mart kuni bo‘lib o‘tadi.
