"Интер" ҳужумчиси Марко Арнаутович Чемпионлар лигаси 1/8 финалида "Атлетико"га қарши ўйинда (1:0) ғалаба голини ургани ҳақида гапирди.

Учрашувнинг 46-дақиқасида австриялик футболчи жароҳат олган Маркус Тюрамнинг ўрнига майдонга тушган бўлса, 79-дақиқада Лаутаро Мартинеснинг узатмасидан сўнг рақиб дарвозасига зарба йўллади. Учрашув якунида Арнаутович учрашувнинг энг яхши футболчиси деб топилди.

"Маркусга ачинаман, жамоадошим ўйинни тарк этгани унчалик ёқимли эмас. Бироқ, бу ерда мен чиқиб, ҳисса қўшишим керак эди. Мухлислар доим мен томонда бўлишган. Фаолиятимдаги энг муҳим голлардан бири деб ҳисоблаган голни урганим мен учун ақл бовар қилмайдиган лаҳза бўлди. Менинг бутун оилам шу ерда эди, мен жуда хурсандман.

Бизда фантастик ва кучли жамоа бор ва ҳамма қўлидан келганини қилишга ҳаракат қилмоқда. Энди Мадридда яна бир катта ўйин кутиб турибди: биз у ерга ғалаба қозониш учун борамиз", - деди Арнаутович "Интер" расмий сайтига.

Жорий мавсумда 34 ёшли ҳужумчи 25 та ўйин ўтказиб, 4 та гол урди ва 3 та голли узатмани амалга оширди.

Жамоалар ўртасидаги жавоб учрашуви 13 март куни бўлиб ўтади.