2025 yilgi Klublar o‘rtasidagi JCHda OFKdan 4 ta klub ishtirok etishidan xabaringiz bor. Shuningdek, shu yildan start oladigan Qit’alararo kubokda Osiyo, Afrika, Okeaniya, Janubiy va Shimoliy Amerika qit’alarining chempion klublari finalda UYEFA Chempionlar ligasi g‘olibiga qarshi maydonga tushish uchun saralash bosqichida ishtirok etishadi.
Dastlabki o‘yinda qur’aga ko‘ra, Osiyo yoki Afrika chempioni Okeaniya chempioniga qarshi bahs olib boradi. O‘yin g‘olibi, qur’aga asosan, A bosqichiga avtomatik tarzda yo‘l olgan jamoaga qarshi to‘p suradi. B bosqichida esa KONMEBOL va KONKAKAF chempionlari o‘zaro bahs olib boradi. Ushbu o‘yinlar kimning maydonida bo‘lib o‘tishi qur’a orqali aniqlanadi.
A va B bosqichlari g‘oliblari o‘rtasidagi pley-off uchrashuvi 2024 yilning 14 dekabr kuni o‘tkazilib, g‘olib jamoa 18 dekabr kungi finalda UYEFA Chempionlar ligasi g‘olibiga qarshi maydonga tushadi. Pley-off va final o‘yinlari markazlashgan tartibda o‘tkaziladi.
