Eronning «Istiqlol» klubi atrofida hamyurtimiz Oston O‘runov transferi ortidan boshlangan muhokamalar davom etmoqda.

Avvalroq Tehron jamoasi vise-prezidenti Ali Xatir jamoa bosh murabbiyi Javod Nekunam talabi bilan O‘zbekiston milliy jamoasi vingeridan voz kechganligi haqida yozgandik. Biroq Eron termasida yorqin qodirgan Nekunam vise-prezident so‘zlarini inkor etyapti.

Javod Nekunam «Sanat Naft»ga qarshi o‘yindan keyingi matbuot anjumanida Oston O‘runov transferi masalasida yana bir bora izoh berdi:

«O‘runov bizga kerak emasligi haqida gapirganimni isbotlab berishsin. Ayrim shaxslarda o‘sha suhbatimiz audioyozuvi borku, marhamat, ommaga tarqatishsin. Shunda ko‘ramiz, O‘runov kerak emasligi haqida kim gapirganini... Aslida rahbariyatdan O‘runov va eronlik yana ikki futbolchi transferini ko‘p marta so‘raganman. Ayniqsa, o‘zbek futbolchisiga ehtiyoj sezgandim. Ammo klub O‘runov transferi bo‘yicha hech qanday harakatni amalga oshirmadi va u yakunda «Persepolis»ga yo‘l oldi».

Shunda mahalliy jurnalistlardan biri Jaloliddin Masharipov «Istiqlol» safiga qo‘shilganidan so‘ng O‘runov variantidan voz kechilgani haqida savol berdi. «Istiqlol» bosh murabbiyi bu savol javobida ham klub rahbariyatiga «tosh otdi».

«OCHL doirasidagi «Navbahor» - «Nassajiy» o‘yinidan keyinoq O‘runovni sotib olish zarurligini aytgandim. Shunga ham 6 oy bo‘ldi. Mavsum yakunida futbolchining «Navbahor» bilan shartnomasi tugashi va uni o‘z safimizga olishimiz shartligini qayta-qayta ta’kidlanagandim. Ostonning shartnomasi 200 ming dollardan ko‘proqqa tushishidan qat’iy nazar, ushbu futbolchi kerakligini aytganman. Bu borada rasman xat ham yozganman. Masharipov esa safimizga erkin agent maqomida qo‘shildi», - dedi Javod Nekunam.

Eslatma, oldinroq Ali Xatir aynan bosh murabbiyning «Agar O‘runov kelsa, u yoki Masharipov zaxirada o‘tiradi. Nima uchun zaxirachiga pul to‘laysiz? qabilidagi so‘zlaridan keyin Oston bilan shartnoma tuzish variantidan voz kechganini ma’lum qilgandi.