Birinchi o‘rta vazn toifasida sobiq mutlaq jahon chempioni Jermell Charlo bisotidagi so‘nggi — WBA kamaridan ham mahrum bo‘ldi.

Charlo 2022 yilning may oyida o‘z qo‘lida barcha chempionlik kamarlarini birlashtirgan edi. WBA rahbari Hilberto Mendosa rahbarligidagi qo‘mita a’zolari amerikalik 33 yoshli bokschini kamaridan mahrum qilish va uni “ta’tildagi chempion” deb e’lon qilishga ovoz bergan.

“Ta’tildagi chempion” maqomi Charloga birinchi o‘rta vazndagi WBA chempionlik kamari uchun to‘g‘ridan-to‘g‘ri, hech qanday Eliminator, ya’ni saralash janglarisiz ringga chiqish huquqini beradi. Hozircha Jermellning birinchi o‘rta vazn toifasida qolib, janglarni o‘tkazishi ham ma’lum emas.

Avvalroq, 8 mart kuni Saudiya Arabistonining Ar-Riyod shahrida o‘tkaziladigan boks oqshomida birinchi o‘rta vaznda vakant qolgan WBA kamari uchun o‘zbekistonlik Isroil Madrimovning rossiyalik Magomed Kurbanovga qarshi ringga ko‘tarilishi haqida xabar berilgandi. Lekin bu jangning o‘tkazilishi hamon so‘roq ostida qolmoqda.