"Leypsig" bosh murabbiyi Marko Roze jamoasining Chempionlar ligasi 1/8 finalidan chetlatilishi haqida gapirdi.

Nemis klubi Chempionlar ligasi 1/8 finali javob o‘yinida “Real” bilan durang o‘ynadi. “Santyago Bernabeu” stadionida kechgan uchrashuv 1:1 (umumiy 1:2) hisobi bilan yakunlandi.

"Biz yetarlicha gol ura olmadik. Yakunda ular ikkita gol urishdi, biz esa faqat bitta gol urdik. Turnirdan chiqib ketishimizdan juda xafamiz. Bugun yigitlar haqiqatan ham ko‘proq narsani xohlashlarini, oldinga borishni istashlarini ko‘rsatishdi.

Bizda mahoratli futbolchilar ko‘p va Bundesligada ko‘p gol uramiz. Ehtimol, ba’zi vaziyatlarda bizda ozgina tajriba yoki xotirjamlik yetishmagandir.

Xo‘sh, ba’zida ozgina omad zarar qilmaydi, usiz buning iloji yo‘q", - deya Rozening so‘zlarini keltiradi UEFA rasmiy sayti.

Germaniya chempionatida “Leypsig” 43 ochko bilan beshinchi o‘rinda bormoqda. “Bayer” turnir jadvalida peshqadamlik qilmoqda (64 ochko).