Isroil Madrimovning vaznida chempionlik kamari uchun sobiq da’vogar Mishel Soro bokschilarning ertangi jangdagi imkoniyatlari haqida gapirdi.
Xabaringiz bor, ertaga Saudiya Arabistoni poytaxti Ar-Riyod shahrida navbatdagi professional boks oqshomi o‘tkaziladi. Uning doirasida hamyurtimiz Isroil Madrimov rossiyalik Magomed Kurbanovga qarshi ringga ko‘tariladi. Jang g‘olibi vakant bo‘lib turgan WBA kamarini qo‘lga kiritadi.
"Men butun vujudim bilan Madrimovning g‘alabasiga ishonyapman. U haqiqiy jentlmen va chempion. Isroil Kurbanovdan har tomonlama yaqqol ustun va kuchli. Ishonchim komil, u firibgar Magomedni dodini berib qo‘yadi. Aslida bu chempionlik jangida men ringga chiqishim kerak edi. Mening Kurbanovga qarshi kechgan jangimdagi korrupsiya botqog‘iga botgan hakamlar ertaga bo‘lmaydi. Magomedga endi hakamlar yordam bera olmaydi. Isroil, senga omad tilayman. Kurbanovni "yo‘q" qil va keyin men bilan jang o‘tkaz", - dedi Soro.
Eslatib o‘tamiz, o‘tgan yilning may oyida Rossiyada o‘tgan boks oqshomida Kurbanov hakamlarning yordamida Soroni mag‘lubiyatga uchratgan edi. Buni o‘shanda hatto rossiyalik jurnalistlar ham aytishgandi. Madrimov va Soro esa shu kungacha ikki bor to‘qnash kelgan. Toshkentdagi jangda Madrimov texnik nokaut evaziga g‘alaba qozongan bo‘lsa, Londondagi jangning ikkinchi raundidan keyin Mishel qoshi yorilgani uchun bahsni davom ettira olmagandi.
