Bir hafta muqaddam O‘zbekiston Professional futbol ligasi rasmiy saytida “Yoshni kichraytirish bilan bog‘liq masala Liga tomonidan prokuraturaga oshirilgani” bo‘yicha maqola chop etilgan edi. Maqolada “Bunyodkor” U-19 jamoasi safida ro‘yxatdan o‘tgan, ammo bugungi kunda yuridik tomondan klubga tegishli bo‘lmagan futbolchining ishi bo‘yicha Samarqand viloyati prokuraturasiga murojaat yo‘llangani bildirilgan.

“Bunyodkor” futbol klubi mazkur ish bo‘yicha quyidagilarni ma’lum qiladi:

O‘zbekiston Professional futbol ligasi nazarda tutgan futbolchi 2022 yilning yanvar oyida “Bunyodkor” futbol klubi bilan ikki yilga mo‘ljallangan shartnoma imzolagan. Ya’ni, futbolchi “Bunyodkor” akademiyasi tarbiyalanuvchisi emas, balki voha klublaridan biridan jamoamiz safiga qo‘shilgan. 2022 yilgi mavsumda “Bunyodkor” U-19 safida ro‘yxatdan o‘tgan, mavsum davomida jami 12ta uchrashuvda maydonga tushgan. Bellashuvlarning 4tasini asosiy tarkibda boshlagan bo‘lsa, 8tasida zaxiradan qo‘shilgan. Umumiy hisobda 510 daqiqa maydonda to‘p surgan. 2023 yilning aprel oyida jamoaning yangi bosh murabbiyi Artur Kagirovning bildirgisi va tomonlarning o‘zaro kelishuvga ko‘ra shartnoma bekor qilingan.

“Bunyodkor” futbol klubi bu kabi ishlarga doimo qarshi bo‘lib kelgan va O‘zbekiston Professional futbol ligasi hamda tegishli tashkilotlar bilan hamkorlikda ish olib borishini ma’lum qiladi.