Il Corriere dello Sport xabariga ko‘ra, AQSH terma jamoasi a’zosi Kristian Pulishich bu mavsumda "Milan"da kutilganidan-da yaxshi o‘ynamoqda va "rossonerilar"ning A Seriya tarixidagi 5000-golini urdi.
Pulishich "San-Siro"da barcha musobaqalarda 39 ta o‘yinda 12 ta gol urdi va 8 ta golli uzatmani amalga oshirdi.
U "rossonerilar" uchun so‘nggi to‘rtta bahsda gol urdi va to‘qqizta gol bilan A Seriya tarixida eng ko‘p gol urgan AQSH o‘yinchisiga aylandi va "Yuventus" yarim himoyachisi Ueston Makkenni bilan tenglashdi.
Il Corriere dello Sport shuningdek, Pulishich joriy mavsumda "San-Siro"da kutilganidan yaxshiroq o‘ynayotganini ta’kidladi, chunki u 2023-24 yilgi mavsumda vinger sifatida Samuyel Chukvuzega qarshi kurash olib borishi kutilgandi. Biroq u darhol "Milan"ning asosiy o‘yinchisiga aylandi va ularning joriy mavsumdagi eng hal qiluvchi o‘yinchilaridan biri bo‘ldi, shubhasiz, mart oyidagi eng yaxshi futbolchi desak mubolag‘a bo‘lmaydi.
"Milan" Pulishichni 2023 yilning yozida "Chelsi"dan 20 million yevro evaziga sotib olgandi. Amerikalik vinger A Seriya grandi bilan 2027 yilning iyunigacha shartnoma imzoladi.
