Xavi, agar u klubda qolsa, yozda "Barselona" jiddiy kuchayishini istamoqda.

Yanvar oyi oxirida "Vilyarreal"ga 3:5 hisobida mag‘lub bo‘lgan Xavi mavsum oxirida "Barselona" bosh murabbiyi lavozimini tark etishini e’lon qildi. O‘shandan beri jamoa hech qachon mag‘lub bo‘lmagan, sakkiz marta g‘alaba qozongan va uch marta durang o‘ynagan. "Barselona" Xavini jamoada qolishni talab qilmoqda.

Mundo Deportivo yozganidek, murabbiy hali o‘z fikridan qaytgani yo‘q. Biroq Xavi bu mavzuda gapirganda doimo “bugun uchun” iborasini qo‘llashi Kataloniya klubi rahbariyatida umid uyg‘otadi. Shunga qaramay, murabbiyning yaqinlari uning qarorida qat’iy ekanini aytishmoqda.

Manbaga ko‘ra, Xavining qarorini bir necha omillar o‘zgartitishi mumkin. Masalan, muvaffaqiyatli natijalar. Muvaffaqiyat Chempionlar Ligasi va/yoki La Ligada g‘alaba qozonish yoki bu sovrinlar uchun oxirigacha kurashish deb hisoblanadi. Bu holatda Xavi fikrini o‘zgartirib, qolishi mumkin. Uning oilasi buni tushunishadi.

Ammo bu holatda ham "Barselona" rahbariyati murabbiy qo‘ygan shartlarga rozi bo‘lishi kerak: Xavi tarkibni kuchaytirishni so‘raydi. U kelgusi yozni avvalgidek o‘tkazishni istamaydi. Agar "Barsa" kuchli tarkibni shakllantirish uchun puli borligiga kafolat bera olmasa, mavsum yakunidan qat’i nazar, Xavi albatta ketadi. Xavi har doim barcha mumkin bo‘lgan sovrinlar uchun kurashishni xohlagan, lekin 16, 17 yoki 18 yoshli futbolchilar hisobiga emas.

Xavini qolishga ishontirish uchun "Barsa" o‘zi kerak deb hisoblagan futbolchilarning transferini kafolatlashi kerak. Gap, birinchi navbatda, yarim himoyachilar haqida ketmoqda. Bular Martin Subimendi (“Real Sosyedad”), Joshua Kimmix (“Bavariya”) va Bernardu Silva (“Manchester Siti”).