Premyer-liga kelasi mavsumda moliyaviy qoidalarni o‘zgartirmaydi.

Hozirda klublar uch yil davomida 105 million funt sterlingdan ortiq zarar ko‘rmasligi kerak. Qoidabuzarliklar uchun klublar sanssiyalarga duchor bo‘ladi: bu mavsumda "Everton" sakkiz ochkodan, "Nottingem Forest" esa 4 ochkodan mahrum bo‘ldi.

Avvalroq, liga va ishtirokchi klublar amaldagi moliyaviy qoidalarga o‘zgartirishlar kiritish zarurligi borasida kelishib olgani ma’lum bo‘lgandi. Katta ehtimol bilan qoidalarga Yevropa musobaqalarida o‘ynaydigan klublarning transferlari uchun sarflanadigan mablag‘lar chegarasi kiritiladi.

UYEFA ushbu klublar uchun xarajatlar chegarasini daromadning 70 foiz qilib belgilashni rejalashtirmoqda. APLda katta ehtimol bilan limit yuqoriroq bo‘ladi - klublar daromadning 85 foizini sarflashlari mumkin bo‘ladi. Bu masala bo‘yicha ovoz berish yozda bo‘lib o‘tadi.

O‘zgarishlar tafsilotlari hali ishlab chiqilishi kerak bo‘lgan holda, amaldagi qoidalar yana bir mavsum o‘z kuchida qoladi, deb yozadi BBC. Limitdan oshib ketgan klublarni jazolash uchun ochkolarni olib tashlash tamoyili yangi qoidalar joriy qilingan taqdirda ham saqlanib qolishi kutilmoqda.