Xabi Alonsoga "Bayer"ni chempionlik sari yetaklash uchun 557 kun kerak bo‘ldi.
Ispaniyalik murabbiyi jamoani 2022 yil 5 oktyabrida qabul qilib olgan. O‘shanda "Bayer" turnir jadvalida 17-o‘rinni egallab, quyi ligaga tushib ketish xavfi ostida qolgan edi.
Yakunda leverkuzenliklar 2022/23 yilgi mavsumni Germaniya chempionatida 6-o‘rinda yakunladi. "Bayer" Alonsoning birinchi mavsumida ham Yevropa ligasining yarim finaliga chiqdi, biroq "Roma"ga umumiy hisobda mag‘lub bo‘ldi (0:1, 0:0).
Jamoa hozirda Alonso qo‘l ostida ikkinchi mavsumni o‘tkazmoqda. 2024 yilning 14 aprelida (murabbiy tayinlanganidan 557 kun o‘tib) "Bayer" Bundesliga chempionligini qo‘lga kiritdi. Bundan tashqari, joriy mavsumda jamoa Germaniya kubogi finaliga yo‘l oldi va u yerda 25 may kuni "Kayzerslautern" bilan uchrashadi. "Bayer" Yevropa Ligasi kubogi uchun ham da’vogarlardan biri bo‘lib qolmoqda. Birinchi chorak final o‘yinida leverkuzenliklar "Vest Xem"ni mag‘lub etishdi (2:0), javob o‘yini 18 aprel kuni bo‘lib o‘tadi.
