Хаби Алонсога "Байер"ни чемпионлик сари етаклаш учун 557 кун керак бўлди.
Испаниялик мураббийи жамоани 2022 йил 5 октябрида қабул қилиб олган. Ўшанда "Байер" турнир жадвалида 17-ўринни эгаллаб, қуйи лигага тушиб кетиш хавфи остида қолган эди.
Якунда леверкузенликлар 2022/23 йилги мавсумни Германия чемпионатида 6-ўринда якунлади. "Байер" Алонсонинг биринчи мавсумида ҳам Европа лигасининг ярим финалига чиқди, бироқ "Рома"га умумий ҳисобда мағлуб бўлди (0:1, 0:0).
Жамоа ҳозирда Алонсо қўл остида иккинчи мавсумни ўтказмоқда. 2024 йилнинг 14 апрелида (мураббий тайинланганидан 557 кун ўтиб) "Байер" Бундеслига чемпионлигини қўлга киритди. Бундан ташқари, жорий мавсумда жамоа Германия кубоги финалига йўл олди ва у ерда 25 май куни "Кайзерслаутерн" билан учрашади. "Байер" Европа Лигаси кубоги учун ҳам даъвогарлардан бири бўлиб қолмоқда. Биринчи чорак финал ўйинида леверкузенликлар "Вест Хэм"ни мағлуб этишди (2:0), жавоб ўйини 18 апрель куни бўлиб ўтади.
