Germaniya terma jamoasi bosh murabbiyi Yulian Nagelsmann "Bayer"ning Bundesligadagi chempionligi haqida gapirdi. Mavsum tugashiga besh tur qolganida "dorichilar" o‘zlariga oltin medallarni kafolatlashdi.
“Jamoani, murabbiylarni va umuman, butun klubni tabriklayman. "Bayer" bu mavsumda eng kuchlisi bo‘ldi va haqli ravishda chempionlikni qo‘lga kiritdi. Jamoa o‘yinida Xabi Alonsoning uslubi juda ko‘zga tashlanadi. Germaniya terma jamoasi futbolchilari ushbu g‘alabada muhim rol o‘ynaganidan juda xursandman. Bu ularga Yevropa chempionati oldidan foyda keltiradi", - deya mutaxassisning so‘zlarini keltiradi Germaniya futbol assosiasiyasi matbuot xizmati.
"Bayer"ning chempionatdagi navbatdagi o‘yini safarda "Borussiya Dortmund"ga qarshi bo‘ladi.
