Германия терма жамоаси бош мураббийи Юлиан Нагельсманн "Байер"нинг Бундеслигадаги чемпионлиги ҳақида гапирди. Мавсум тугашига беш тур қолганида "доричилар" ўзларига олтин медалларни кафолатлашди.
“Жамоани, мураббийларни ва умуман, бутун клубни табриклайман. "Байер" бу мавсумда энг кучлиси бўлди ва ҳақли равишда чемпионликни қўлга киритди. Жамоа ўйинида Хаби Алонсонинг услуби жуда кўзга ташланади. Германия терма жамоаси футболчилари ушбу ғалабада муҳим рол ўйнаганидан жуда хурсандман. Бу уларга Европа чемпионати олдидан фойда келтиради", - дея мутахассиснинг сўзларини келтиради Германия футбол ассоциацияси матбуот хизмати.
"Байер"нинг чемпионатдаги навбатдаги ўйини сафарда "Боруссия Дортмунд"га қарши бўлади.
