“Humo Arena”da 14 aprel, yakshanba kuni “IBA Chempionlar oqshomi” bo‘lib o‘tdi.

Ushbu jang oqshomida Bahodir Jalolov ham ishtirok etishi kerak edi. Biroq, jangdan oldinroq, Jalolov turnirda ishtirok etmasligi haqida xabarlar chiqdi. Uning o‘rnini esa Jahongir Zokirov egalladi.

O‘zbekiston boks federasiyasi bosh kotibi Shohid Tillaboyev Bahodir nega bu oqshomda jang qilmagani haqida gapirdi.

"Xabaringiz borki, Xalqaro boks assosiasiyasi 2021 yildan professional va yarim professional boks musobaqalarni tashkil etishni boshladi. Toshkent ushbu musobaqalarni tashkil etishda katta tajribaga ega, bundan tashqari poytaxt 2023 yilda boks bo‘yicha jahon chempionatini qabul qildi.

Ushbu kechani tashkil etishda Xalqaro boks assosiasiyasi prezidenti Umar Kremlyov muxlislar o‘rtasida so‘rovnoma o‘tkazdi va unda O‘zbekiston poytaxti yutib chiqdi.
Ushbu musobaqa o‘zbekiston bokschilari uchun galdagi bellashuvlar uchun tayyorgarlik vazifasini o‘tab beradi.

O‘zbekiston kelajakda har qanday xalqaro boks musobaqalarni o‘tkazishga tayyor.

Bahodir Jalolovning bu jangga tayyorlanayotgan edi. Ozarbayjondagi musobaqadan qaytgach, bokschida shamollash alomatlari sezildi. Bahodir Jalolov hozirda bor e’tiborini Olimpiada bahslariga qaratgani uchun murabbiylar kengashi kelishib yosh Jahongir Zokirovga imkoniyat berishga qaror qildi", — dedi Shohid Tillaboyev.

Bahodir o‘rniga ringga ko‘tarilgan Jahongir Zokirov Xorvatiya vakili Agron Smakichini ochkolar evaziga mag‘lub etdi.