Darvozabon Fernando Muslera terma jamoadagi faoliyatini yakunlashga qaror qildi - u endi Urugvay terma jamoasida o‘ynamaydi. Bu haqda terma jamoa matbuot xizmati xabar berdi.
Muslera Urugvay terma jamoasi safida 133 ta o‘yin o‘tkazgan. Posbonning asosiy yutug‘i 2011 yilda Amerika kubogini qo‘lga kiritgani bo‘ldi. Aytish joizki, Muslera uzoq vaqtdan beri Urugvay terma jamoasida o‘ynamagan. Darvozabon oxirgi marta 2022 yilning iyun oyida Panamaga qarshi o‘rtoqlik o‘yinida milliy terma jamoa safida maydonga tushgandi.
Qatardagi jahon chempionatida Muslera zahiradagi darvozabon bo‘ldi. Qo‘shimcha qilamizki, Fernando Muslera iyun oyida o‘zining 38 yoshini nishonlaydi. Klub darajasida futbolchi "Galatasaroy" sharafini himoya qiladi.
