Дарвозабон Фернандо Муслера терма жамоадаги фаолиятини якунлашга қарор қилди - у энди Уругвай терма жамоасида ўйнамайди. Бу ҳақда терма жамоа матбуот хизмати хабар берди.
Муслера Уругвай терма жамоаси сафида 133 та ўйин ўтказган. Посбоннинг асосий ютуғи 2011 йилда Америка кубогини қўлга киритгани бўлди. Айтиш жоизки, Муслера узоқ вақтдан бери Уругвай терма жамоасида ўйнамаган. Дарвозабон охирги марта 2022 йилнинг июнь ойида Панамага қарши ўртоқлик ўйинида миллий терма жамоа сафида майдонга тушганди.
Қатардаги жаҳон чемпионатида Муслера заҳирадаги дарвозабон бўлди. Қўшимча қиламизки, Фернандо Муслера июнь ойида ўзининг 38 ёшини нишонлайди. Клуб даражасида футболчи "Галатасарой" шарафини ҳимоя қилади.