«Atletik»ning Ispaniya kubogi-2023/2024dagi g‘alabasi Bilbaoda misli ko‘rilmagan darajada nishonlandi

Jumladan, klub futbolchilari La Gabarra qayig‘ida Nervion daryosi bo‘ylab sayrga chiqishdi. Sohil esa bilbaoliklar bilan to‘lib ketdi: xursandchilik, mushakbozlik, benazir manzara. Bu - 40 yildan so‘ng shaharga qaytgan o‘zgacha bayram!

Ma’lumotlarga ko‘ra, shu kuni Baskoniyada chamasi 1 million (!!!!) odam shahar ko‘chalariga chiqdi va kubokni «Atletik» bilan birga «yuvdi». Ayniqsa, Nervion daryosi bo‘yida tumonat odam yig‘ildi. Qisqasi, bilbaoliklar butun qirg‘oq bo‘ylab tizilishdi. Hattoki, ko‘priklarda ham bo‘sh joy qolgani yo‘q. Uylarning ayvonlari va balkonlari ham to‘lib ketdi va har nuqtaga «Atletik» sharafiga bayroq osildi.

Bilbaoda bunday futbol bayrami ilk marta 40 yil oldin kuzatilgandi. O‘shanda Xav­er Klemente boshqaruvidagi «Atletik» mavsum-1982/1983ning oxirgi turida «Real»ni yengish asnosida o‘z tarixida 7-marta Ispaniya chempioni bo‘lgandi. Xullas, 3 may kuni Bilbao orqali oqadigan Nervion daryosiga oddiygina yuk barjasi (kema) tushadi va unga futbolchilar, murabbiylar chiqishadi. Aytishlaricha, 1983 yilgi bayramda ham deyarli 1 million kishi qatnashgan. 1960 yili Bilbao porti buyurtmasiga asosan yasalgan va yuk tashish uchun mo‘ljallagan kema keyinchalik «Atletik» barjasi» nomini olgan. Jamoa keyingi mavsum «oltin dubl»ni rasmiylashtiradi va mega-bayram takrorlanadi. Ikkinchisida 1,2 million odam yig‘ilgani haqida ma’lumotlar bor. Mana, oradan 40 yil o‘tib, Bilbao yana mislsiz bayram og‘ushida qoldi. Aytgancha, barja bu vaqt davomida Bilbao dengiz muzeyida saqlandi. Bask­lar bu oraliqda Ispaniya superkubogini 2 marta (2015 va 2021 yillarda) yutishdi, ammo klub g‘alaba sharafiga barja emas, balki avtobusda paradga chiqdi. 2020 yili esa Bilbao shahar kengashi qarori bilan kema 200 ming yevro hisobiga to‘liq rekonstruksiya qilindi. Shunday qilib, barja yana suvga tushdi 40 yildan keyin.

AYTGANCHA...

Aslida g‘alabani barjada nishonlash g‘oyasi «Atletik»ka tegishli emas. Baskoniyada bunday bayram ilk marta 1924 yili Bilbaoning yana bir klubi «Asero» Ikkinchi ligada g‘alaba qozonganidan keyin o‘tkazilgan. Umuman, bu kema Biskayya provinsiyasi sanoat ramzi hisoblanadi. Ancha ommalashgan «Nervion daryosi bo‘ylab barja...» qo‘shig‘i ham «Asero»ga bag‘ishlashgan, ammo u endi asosan «Atletik» sharafiga kuylanadi. Mana, «Atletik» barjasi» naq 40 yil ichida ilk marta qo‘shiqda emas, suvda suzdi…