Saudiya Arabistoni olimpiya terma jamoasi bosh murabbiyi Saad ash-SHehriy chorak final bosqichida O‘zbekistonga qarshi bo‘lib o‘tgan o‘yin borasida o‘z fikrlari bilan o‘rtoqlashdi.

"Kutilganidek, og‘ir o‘yin bo‘ldi. Birinchi taymda teng o‘yinga guvoh bo‘ldik. Har ikki jamoa faol o‘yin namoyish etdi. O‘zbekiston esa bitta imkoniyatdan foydalanib ketdi. Bunday bahslarda kichik detallar ko‘p narsani hal qiladi.

Ikkinchi bo‘limda esa to‘xtalishlar ko‘p bo‘ldi. Qizil kartochka esa o‘yinimizga ta’sir ko‘rsatdi. Futbolchilarimiz bor kuchlarini sarflashdi. Ammo bu yetarli bo‘lmadi.

Shu bilan bu jamoa o‘z faoliyatini yakunlaydi. Bu yigitlar bilan 4 yil davomida ko‘p yutuqlarga erishdik. Maqsadimiz Olimpiadada ishtirok etish edi. Shunga qaramay, ushbu avlod futbolchilari Saudiya Arabistoni milliy jamoasi safiga kirishga muvaffaq bo‘ldi. Ishonchim komil, ularning salohiyati yuqori. O‘yinchilar mazkur mag‘lubiyatni unutgan holda Saudiya Arabistoni futbolini yuqoriga ko‘tarish uchun harakatni davom ettirishlari kerak", — dedi Shehriy.