O‘zbekiston Kubogining guruh bosqichidan o‘rin olgan «Olimpik» – «Chig‘atoy» (8:1) uchrashuvidan so‘ng mezbonlar murabbiyi Server Jeparov o‘z fikrlarini bildirib o‘tdi.

— Jamoamiz a’zolarini g‘alaba bilan tabriklayman. Navbatdagi bosqich vazifasi 1-o‘rin bilan hal etildi. Bu albatta yoqimli. Ushbu natijaga erishishimizda hissasini qo‘shgan klubning har bir a’zosiga minnatdorchilik bildiraman.

O‘yindan oldin yigitlarga bugun yaxshi va chiroyli futbol ko‘rsatishimiz kerak deb aytgandim. Vaziyatlardan unumli foydalanish va qo‘limizdan kelganicha gollar urish lozimligi haqida aytdim. Bugun raqib darvozasiga 8 ta to‘p kiritdik va jamoamiz keyingi bosqichga birinchi o‘rin bilan chiqdi.

— Ertaga U-23 terma jamoamiz Osiyo Kubogi yarim final uchrashuvida maydonga chiqadi. Bu o‘yin haqida fikrlaringiz...

— Omad, g‘alaba va muvaffaqiyatli o‘yin tilaymiz. «Olimpik» loyihasining tashkil etilishi o‘z samarasini berishiga bir qadam qoldi. Ertaga mana shu vazifani uddalab, bu loyihada mehnat qilgan barchaning yuzi yorug‘ bo‘lishini tilab qolaman. Butun O‘zbekiston ahli birgalikda muxlislik qilamiz.