2023 yilning bahorida tashkil etilgan Turkmanistonning «Arqadag‘» klubi o‘z tarixidagi 37ta o‘yinda ham g‘alaba qozonib, Ginness rekordlar kitobida qayd etilgan natijani yaxshiladi.

Bu borada jahon rekordi yaqindagina Saudiya Arabistonining «Al-Hilol» klubi tomonidan rasmiylashtirilgandi - ketma-ket 34ta g‘alaba. Biroq The Guardian nashrida yozilishicha, Ginness kitobi turkman klubi natijasini tan olishga shoshilmayapti. «Turkmaniston ligasi haqida ma’lumot juda oz, bu kabi rekordlar bo‘yicha olib borgan tadqiqotlarimiz ham xohlaganimizdan kam. Odatda boshqaruv tizimi va raqobat darajasiga ham qaraymiz. Xullas, shu sabablar bilan «Al-Hilol» rekordchi ekanligini tasdiqladik», - deya izoh berdi vaziyatga Ginness kitobi vakili.

Ma’lumot uchun, Turkmanis­ton prezidenti Gurbanguli Berdimuhamedov sharafiga tuzilgan «Arqadag‘» debyut mavsumida 24ta o‘yinning barchasida g‘alaba qozonib, chempion bo‘ldi. Shuningdek, mamlakat kubogida 7ta o‘yinni o‘z foydasiga hal qildi. Turkmaniston ligasining yangi mavsumida esa 6ta g‘alaba rasmiylashtirildi. Biroq ta’kidlanishicha, o‘yinlarini o‘rtacha hisobda 200 muxlis kuzatadigan yangi yetakchining ba’zi natijalari sir tutilgan. Deylik, o‘z hududida «engilmas jamoa» sifatida ta’riflanayotgan «Arqadag‘» fevral oyida «Shaxtyor» va «Dnepr»ga qarshi kechgan o‘rtoqlik uchrashuvlarida mag‘lubiyatga uchragan, ammo turkman matbuoti bu haqda biror xabar chop etmagan.

The Guardian nashrida ta’kidlanishicha, o‘tgan yilning noyabr oyida «Shagadam» bilan o‘yin 2:2 hisobida yakunlanayotgan pallada «Arqadag‘» foydasiga shubhali penalti belgilangan va jamoa shuning evaziga g‘alaba qozongan. Shuningdek, «Arqadag‘» o‘tgan mavsum boshlanishidan oldin mahalliy ligadagi eng yaxshi futbolchilarni o‘z tomoniga og‘dirgan. Bu qoidaga zid emas, ammo yangi klub kerakli ijrochilar bilan shartnoma tuzishi uchun hattoki, Turkmanistonda transferlar vaqti uzaytirilgan. Shunday bo‘lsada, turkman jamoasi vakillari Ginness rekordlari kitobiga kirish uchun qayta ariza topshirish imkoniyati tug‘ilishiga ishonishmoqda. Aytish kerak, «Arqadag‘» yozda Osiyo miqyosidagi turnirda debyut qilishi kerak.

Saudiyaning «Al-Hilol» klubi joriy yil mart oyida g‘alabali seriyasini 28ta o‘yinga cho‘zib, jahon rekordini yangiladi. Yulduzlarga to‘la jamoa shundan keyin o‘ziga tegishli rekordni yana 6 marta yangiladi - ketma-ket 34ta g‘alaba.  Saudiya chempio­nati gegemonii yurishiga esa yaqindagina OCHL yarim finali birinchi o‘yinida «Al-Ayn» tomonidan nuqta qo‘yildi.

M.PO‘LATOV tayyorladi