Madridning “Atletiko” klubi Antuan Grizmann bilan shartnomani uzaytirmoqchi.
AS xabariga ko‘ra, o‘tgan hafta Grizmann va "Atletiko" vakillari o‘rtasida fransiyalik hujumchi bilan shartnomani uzaytirish bo‘yicha ilk muzokaralar bo‘lib o‘tgan.
Futbolchining opasi va agenti Mod Grizmann “matraschilar” jamoasi rahbariyati bilan uchrashib, yangi shartnoma shartlarini muhokama qilgan.
Qayd etilishicha, Grizmann va Madrid klubi o‘rtasidagi munosabatlar a’lo darajada, kelishuvga erishish qiyin bo‘lmaydi.
Antuanning amaldagi shartnomasi 2026 yilgacha mo‘ljallangan va agar ma’lum shartlar bajarilsa, uni bir yilga uzaytirish imkoniyati mavjud, manba qayd etganidek, buni bajarish qiyin emas.
Ta’kidlanishicha, "Atletiko" Grizmanni futbolchining o‘zi xohlagancha saqlab qolishga tayyor. Rahbariyat fransiyalik futbolchini klub afsonasi deb biladi va uning shartnomasini uzoqroq muddatga uzaytirishi uchun hech qanday to‘siq yaratmaydi.
