Fransiya futbol federasiyasi birinchilardan bo‘lib, Yevro-2024dagi ishtirok uchun mamlakat milliy jamoasi futbolchilariga beriladigan bonuslar miqdorini e’lon qildi.

Oddiy ifoda etganda, mukofot puli summasi tayin, faqat qanchaligi Didye Desham jamoasining Germaniyada qanday natija qayd etishiga bog‘liq.

Avvalo, eslatish kerak, Yevropa chempionati-2024ga 14 iyun kuni start beriladi. Final o‘yini esa 14 iyulga belgilangan. Fransiya futbol federasiyasi va’da qilgan mukofot puliga kelsak, jamoa Yevro-2024da ishlagan bonusning 30 foizi futbolchilarga tarqatiladi. Demak, Didye Desham shogirdlari Germaniyadagi turnirda qancha uzoqqa borishsa, shuncha ko‘p olishadi. UYEFA esa Yevro-2024 ishtirokchilari natija ortidan qancha ishlashlari mumkinligini allaqachon tasdiqlagan:

Guruh bosqichidagi har bir g‘alaba uchun - 1 million yevro

Guruh bosqichidagi har bir durang uchun - 500 ming yevro

1/8 final uchun - 1,5 million yevro

Chorak final uchun - 2,5 million yevro

Yarim final uchun - 4 million yevro

Final uchun - 5 million yevro

Chempionlik uchun - 8 million yevro

Umuman, bo‘lajak turnir g‘olibi maksimal darajada 28,25 million yevro ishlashi mumkin qo‘shimcha to‘lovlar hisobiga. Demak, Fransiya milliy jamoasi Yevro-2024da maksimal bonusga munosib ekanligini isbotlasa, futbolchilarga 8,47 million yevro ajratiladi. Bunda har bir futbolchiga qancha tegishi jamoa «zayavka»si hajmiga bog‘liq. Ya’ni agar Didye Desham tarkibga 23 nafar futbolchi jalb etsa, unda har biri 320 ming yevrodan oladi maksimal bonus ishlangan taqdirda. Bordiyu, 26 nafar futbolchi ro‘yxatga tushsa, individual ulush biroz pasayadi o‘z-o‘zidan (290 ming yevro).

L`Equipe nashrida qayd etilishicha, fransiyalik futbolchilar UYEFA to‘lovidan tash­qari, imidj huquqi ulushiga ham umid bog‘lashlari mumkin. Deylik, jamoa finalga chiqsa, har bir futbolchi imidj huquqi ortidan chamasi 150 ming yevro oladi (har bir o‘yin uchun 21200 yevro). Xullas, Fransiya milliy jamoasi Yevropa chempioni bo‘lsa, har bir futbolchining daromadi umumiy miqdorda 470 ming yevroga yetishi mumkin. Aytgancha, Fransiya termasi bilan JCH-2022 finaliga chiqqan futbolchilar aynan 490 ming yevrodan olishgandi.