7-tur doirasida o‘tkazilgan «Neftchi» – «Andijon» uchrashuvi hali hamon qizg‘in muhokama qilinmoqda, albatta yaxshi ma’noda. Bunday o‘yin fonida O‘zbekiston chempionatining darajasi ham ko‘tarilib borayotgani ko‘rinyapti.

Ayniqsa, «Andijon» futbolchisi Farhod Sohibjonov tomonidan urilgan gol nafaqat O‘zbekiston, balki boshqa mamlakatlarda ham hayrat bilan qarshi olinmoqda.

Trendga aylangan Sohibjonov «Andijon» matbuot xizmatiga intervyu berdi.

— Farhod siz qanday gol urganingizni bilasizmi? Hammani og‘zida sizning golingiz...Bu qanday sodir bo‘ldi?

— To‘g‘risi, o‘yinni ichida bunchalik gol urganimni bilmagandim. O‘yin harorati balandligi uchun e’tibor bermadim. Omad keldi.

— Golingizni videotakrorda ko‘rganingizda nimalarni o‘yladingiz?

— Juda xursand bo‘lib ketdim. Bunday gol urish faoliyatimda sodir bo‘lganidan Allohga shukr, deyman.

— Hamma Zlatan Ibragimovning goli bilan taqqoslashni boshladilar. Siz ham ko‘rgandirsiz. Zlatan kabi gol urish qanaqa ekan?

— Ha, ko‘rdim. O‘zingizni bunday his qilish, to‘g‘risini aytsam, juda yoqimli ekan.

— Bu «yil goli» bo‘ladi, deb o‘ylaysizmi?

— Xudo xohlasa, bundan ham chiroyli gol urishga harakat qilaman.

— Umuman, vodiy derbisi qanday taassurot qoldirdi? G‘alabaga yaqin edik. Nima yetishmadi, oxirida?

— Ha juda yaqin kelgandik. Hammasi Alloxdan, shunaqa bo‘lish kerak ekan va shu narsa bo‘ldi. Qo‘limizdan kelgancha harakat qildik.

— Farg‘onadagi durang adolatlimi?

— Bilmadim, menimcha, g‘alabaga loyiq edik.

— "Andijon” va uning muxlislari yangi darajaga chiqib oldilar. Buni qanchalik his qilyapsiz va siz yana bu haqida nima degan bo‘lardingiz?

— Albatta, muxlislarga kattakon rahmat. Bizni qayerda bo‘lsak ham yolg‘iz tashlab qo‘yishmayotgani uchun minnatdormiz. Muxlislar bilan biz bir kuchmiz.

— Endi «Metallurg» keladi. Bu o‘yinga tayyorgarlik qanday bo‘ladi?

— Maydonga faqat g‘alaba uchun chiqamiz.