Ijtimoiy tarmoqlarda «Dinamo» PFK jamoasidagi moliyaviy vaziyat hamda Samarqand shahridagi stadionlarning holatiga bog‘liq maqolalar e’lon qilindi.

Jumladan, internet nashrlarida «Samarqandga futbol kerak emasmi?» sarlavhali maqola chop etilib, unda «Dinamo» PFKdagi moliyaviy holat va jamoaning uy stadioni tayyor emasligi haqida so‘z borgan.

Shuni ma’lum qilamizki, jamoa oldidagi muammolar rahbariyat tomonidan birin-ketin hal etilmoqda. «Dinamo» PFK jamoasida bugundan oylik-maoshlar berilishi boshlandi.

Shuningdek, «Dinamo» markaziy o‘yingohini Superliga va xalqaro uchrashuvlarni o‘tkazishga tayyorlash maqsadida «Nasaf Megastroy» MCHJ tomonidan ishlar amalga oshirilmoqda.

Jumladan, futbol maydoniga drenaj tizimini o‘rnatish, sug‘orish tizimini modernizasiya qilish hamda yoritish tizimini kuchaytirish va chim qoplamasini yotqizish ishlari bajarilgan. Ayni vaqtda stadionning yugurish yo‘laklariga asfalt yotqizish ishlari ham amalga oshirilib, ishlar yakunlash arafasida.

Samarqand shahridagi «Afrosiyob Arena» stadionini ham standart holatga keltirish borasida mutasaddilar tomonidan tegishli ishlar boshlangan.