Poytaxtimizdagi "Universal" sport saroyida stol tennisi bo‘yicha "Parij-2024" yozgi Olimpiya o‘yinlariga yo‘llanma beruvchi Markaziy Osiyo mintaqasi saralash turniri boshlandi.
Mazkur turnirda O‘zbekiston, Qozog‘iston, Eron, Turkmaniston va Qirg‘izistondan 18 nafar stol tennischi Olimpiya o‘yinlari yo‘llanmasi uchun raqobatlashmoqda.
Bahslar erkaklar va ayollar o‘rtasida yakkalik yo‘nalishida tashkil etilib, unda faqat oltin medalni qo‘lga kiritgan sportchilar Olimpiada ishtirokchisiga aylanadi. "Parij-2024" Olimpiadasi yo‘llanmasi uchun mamlakatimiz nomidan Zohid Kenjayev, Shohrux Iskandarov, Marhabo Magdiyeva va Rozalina Xo‘jayeva bahslarga kirishadi.
Mazkur musobaqaga tashlangan qur’a natijasiga ko‘ra, musobaqaning erkaklar o‘rtasidagi bahslari «A»guruhida Kiril Gerassimenko (Qozog‘iston), Azamat Ergeshov (Qirg‘iziston), Ilyas Allanazarov (Turkmaniston) o‘zaro raqobatlashsa, «B» guruhida Noshad Alamiyan (Eron), Shohrux Iskandarov (O‘zbekiston) va Alisher Yakupbayev(Qirg‘iziston) to‘qnash keladi. Shuningdek, «C» guruhidan Nima Alamiyan (Eron), Alan Kurmangaliyev (Qozog‘iston) va Zohid Kenjayev (O‘zbekiston) o‘rin oldi.
Eslatib o‘tamiz, bugun, 17 may kuni mazkur musobaqada guruh bahslari, 18 may kuni esa guruh va chorak final bellashuvlari o‘tkaziladi. 19 may kuni esa yarim final va final bellashuvlari tashkil etiladi.
