"Manchester Yunayted" bosh murabbiyi Erik ten Xag Angliya terma jamoasining Yevro-2024 uchun kengaytirilgan tarkibiga kiritilmagan hujumchi Markus Reshfordning formasi haqida gapirdi.

“U yaxshi. Karyerada ko‘tarilishlar va pasayishlar bo‘lishi tabiiy holat. Yiqilish unga kuch berishi mumkin va men mashg‘ulotlarda u juda motivasion holatda ekanligini ko‘raman. U o‘yini bilan javob beradi, u yaxshi karyeraga ega va ishonchim komilki, u buni yengib, yanada ko‘proq gollar uradi", - deya Ten Xagning so‘zlarini keltiradi Goal.

25 may, shanba kuni “qizil iblislar” mavsumdagi so‘nggi o‘yinini o‘tkazadi. "Manchester Yunayted" Angliya kubogi finalida "Manchester Siti"ga qarshi o‘ynaydi.