O‘zbekiston Superligasining 7-turidan o‘rin olgan “So‘g‘diyona” - “Navbahor” (1:2) o‘yinidan keyin “Navbahor” futbolchilari O‘tkir Yusupov hamda Abror Ismoilov g‘alabani raqib jamoa muxlislari qarshisida nomaqbul harakat bilan nishonlagandi.

“Tartib-intizom qo‘mitasining navbatdagi yig‘ilishida mazkur masala ham ko‘rib chiqildi. Yakunda har ikki futbolchi jarimaga tortildi. Biroq O‘tkir Yusupov Superliga 8-turidan o‘rin olgan “Neftchi” klubiga qarshi o‘yinda ham avvalgi holatdan xulosa chiqarmagani uchun ikki karra ko‘proq jarima to‘laydigan bo‘ldi.

Shuningdek, “So‘g‘diyona” va “Navbahor” klubi ustozlari Ivan Boshkovich hamda Samvel Babayan o‘zaro bellashuv davomida texnik zonada o‘zini tutish qoidalariga bir necha bor amal qilmay, provokasion xatti-harakatlarni amalga oshirgani uchun jarima to‘laydigan bo‘ldi.

8-turdan o‘rin olgan “Andijon” — “Metallurg” uchrashuvida mehmon jamoa shifokoriga nisbatan qo‘pol munosabatda bo‘lgan Vladimir Bubanyaning lisenziyasi vaqtincha qaytarib olingandi. Qo‘mita holatni o‘rganib chiqib, boshlanishiga Bubanyaga nisbatan jarima intizom chorasi qo‘llashga qaror qildi. Bu kabi holat takrorlansa, Bubanya bir yoki bir necha rasmiy uchrashuvni o‘tkazib yuborishiga to‘g‘ri keladi”, — deyiladi Tartib-intizom qo‘mitasi bayonotida.