"Manchester Yunayted" bosh murabbiyi Erik ten Xag ingliz klubi rahbariyati uning jamoadagi kelajagi borasidagi qarorini imkon qadar tezroq e’lon qilishini ta’kidlamoqda, deb xabar beradi Sky Sports.
Manbaning qayd etishicha, kelasi haftada "Manchester Yunayted" o‘tgan mavsumni to‘liq tahlil qiladi va shu asosda niderlandiyalik mutaxassisni bosh murabbiy sifatida qoldirish yoki u bilan hamkorlikni tugatish to‘g‘risida qaror qabul qiladi. Ushbu ko‘rib chiqish yakunlanmaguncha, "qizil iblislar" Ten Xagga nisbatan hech qanday chora ko‘rmaydi.
Ten Xag "Manchester Yunayted"ni 2022 yilning yozidan buyon boshqarib kelmoqda. 2023/24 yilgi mavsumda jamoa Premyer-liga turnir jadvalida sakkizinchi o‘rinni egalladi. Shu bilan birga, 54 yoshli murabbiy boshchiligidagi mankunianliklar finalda “Manchester Siti”ni 2:1 hisobida mag‘lub etib, Angliya kubogini qo‘lga kiritdi.
