"Манчестер Юнайтед" бош мураббийи Эрик тен Хаг инглиз клуби раҳбарияти унинг жамоадаги келажаги борасидаги қарорини имкон қадар тезроқ эълон қилишини таъкидламоқда, деб хабар беради Sky Sports.
Манбанинг қайд этишича, келаси ҳафтада "Манчестер Юнайтед" ўтган мавсумни тўлиқ таҳлил қилади ва шу асосда нидерландиялик мутахассисни бош мураббий сифатида қолдириш ёки у билан ҳамкорликни тугатиш тўғрисида қарор қабул қилади. Ушбу кўриб чиқиш якунланмагунча, "қизил иблислар" Тен Хагга нисбатан ҳеч қандай чора кўрмайди.
Тен Хаг "Манчестер Юнайтед"ни 2022 йилнинг ёзидан буён бошқариб келмоқда. 2023/24 йилги мавсумда жамоа Премьер-лига турнир жадвалида саккизинчи ўринни эгаллади. Шу билан бирга, 54 ёшли мураббий бошчилигидаги манкунианликлар финалда “Манчестер Сити”ни 2:1 ҳисобида мағлуб этиб, Англия кубогини қўлга киритди.
