O‘zbekiston Superligasining 10-turidan o‘rin olgan bahsda “Navbahor” o‘z maydonida “Olimpik” (Toshkent)ni qabul qiladi.
“Olimpik” jamoasi 2021 yilda O‘zbekiston Milliy olimpiya qo‘mitasi (MOQ) va O‘zbekiston Futbol assosiasiyasi (O‘FA) tashabbusi bilan 2024 yili Parijda bo‘lib o‘tadigan yozgi Olimpiada o‘yinlariga puxta hozirlik olib borish maqsadida, olimpiya terma jamoasiga nomzod futbolchilardan tuzildi va o‘sha yilgi mavsumda Pro-ligada ishtirok etib, 3-o‘rinni qo‘lga kiritdi hamda Superligaga o‘tish bahsida Muborakning “Mash’al” klubini 3:1 hisobida mag‘lubiyatga uchratib, 2022 yildan buyon Superligada qatnashmoqda.
“Olimpik” tarkibi o‘zagini asosan, 2001 va 2002 yilda tavallud topgan futbolchilar tashkil etishadi. Jamoani esa yaqin o‘tmishning mashhur futbolchilaridan biri bo‘lgan Timur Kapadze boshqarmoqda.
2022 yilning yozida yurtimizda bo‘lib o‘tgan U-23 terma jamoalari o‘rtasidagi Osiyo chempionatida O‘zbekiston U-23 termasi tarkibi o‘zagini “Olimpik” futbolchilari tashkil etishdi hamda U-23 terma jamoamiz finalga qadar yetib borib, vise-chempionlikni qo‘lga kiritdi.
Shu o‘rinda ta’kidlash joizki, joriy yilning aprel oyida Qatarda bo‘lib o‘tgan U-23 Osiyo chempionati musobaqasida tarkibidan ko‘plab “Olimpik” futbolchilari o‘rin olgan O‘zbekiston-U-23 olimpiya terma jamoamiz muvaffaqiyatli ishtirok etib, finalga qadar yetib bordi hamda yurtimiz tarixida ilk bor Olimpiada yo‘llanmasini qo‘lga kiritdi.
Shu tariqa, “Olimpik” oldiga qo‘yilgan maqsadga erishdi va missiya bajarildi.
“Navbahor” hamda “Olimpik” klublari O‘zbekiston Superligasida shu paytgacha 4 ta o‘yin o‘tkazishgan va ularning bittasida “lochinlar”, yana bitasida olimpiyachilar g‘alaba qozonishgan bo‘lsa, 2 ta bellashuvda durang natija qayd etilgan. To‘plar nisbatida tenglik – 5-5.
O‘zaro o‘yinlarda ham har ikki jamoa 5 tadan ochkoga ega.
Jamoalarning o‘zaro o‘yinlardagi natijalari:
2022 yil
05.07.2022. “Olimpik” – “Navbahor” – 1:1 (1:1)
Gollar: Po‘latxo‘ja Xoldorxonov (39) - Jamshid Iskanderov (2).
25.10.2022. “Navbahor” – “Olimpik” – 1:1 (0:1)
Gollar: Jamshid Iskanderov (86) - Muhammadqodir Hamraliyev (42).
2023 yil
28.05.2023. “Navbahor” – “Olimpik” – 2:1 (1:0)
Gollar: Jamshid Iskanderov (43), Oston O‘runov (50) - Ruslanbek Jiyanov (90+3).
24.11.2023. “Olimpik” – “Navbahor” – 2:1 (1:0)
Gollar: Ibrohim Ibragimov (44), Sherzod Esanov (87) – Toma Tabatadze (89).
Eslatib o‘tamiz, “Navbahor” – “Olimpik” uchrashuvi 30 may kuni Namangandagi “Markaziy” stadionida soat 19:30 da start oladi.
“Navbahor” PFK matbuot xizmati.
