"Piza" markaziy hujumchisi Lorenso Lukka "Napoli"ga o‘tishi mumkin.
Jurnalist Ekrem Ko‘nur o‘zining ijtimoiy tarmoqdagi sahifasida “Napoli” 23 yoshli italiyalik hujumchini o‘z safiga qo‘shib olishga urinayotgani haqida yozdi.
Futbolchi o‘tgan mavsumni “Udineze”da ijara asosida o‘tkazib, jamoaning eng yaxshi to‘purariga aylangandi.
Lukka barcha turnirlarni hisobga olgan holda 39 ta o‘yinda maydonga tushdi, 9 ta gol urdi va 4 ta golli uzatmani amalga oshirdi.
Forvardning "Piza" bilan shartnomasi 2026 yilning iyun oyi oxirigacha amal qiladi. Transfermarkt portali ma’lumotlariga ko‘ra, futbolchining narxi sakkiz million yevroga teng.
