Niderlandiya terma jamoasi yarim himoyachisi Frenki de Yong Yevro-2024'ni o‘tkazib yuborishi haqidagi xabarga izoh berdi.
27 yoshli futbolchi to‘pig‘idan olgan jarohati sabab turnirda ishtirok eta olmaydi.
"Yevroda o‘ynay olmasligimdan juda xafaman. Biz so‘nggi bir necha hafta davomida juda qattiq mehnat qildik, ammo to‘pig‘im tiklanishi uchun ko‘proq vaqt kerak. Yirik turnirda terma jamoa safida o‘ynash, to‘q sariq rangli formamizda maydonga tushish, butun mamlakat qo‘llab-quvvatlashini his qilish – orzu. Lekin endi men ham barcha muxlislarimiz kabi jamoaga tashqaridan yordam berib boraman. Davom eting, yigitlar! – deb yozdi de Yong ijtimoiy tarmoqlarida.
Yevro-2024 14 iyundan 14 iyulga qadar Germaniyada bo‘lib o‘tadi. Qur’a natijalariga ko‘ra Niderlandiya terma jamoasi Polsha, Avstriya va Fransiya bilan birga “D” guruhidan joy oldi.
