Нидерландия терма жамоаси ярим ҳимоячиси Френки де Йонг Евро-2024'ни ўтказиб юбориши ҳақидаги хабарга изоҳ берди.

27 ёшли футболчи тўпиғидан олган жароҳати сабаб турнирда иштирок эта олмайди.

"Еврода ўйнай олмаслигимдан жуда хафаман. Биз сўнгги бир неча ҳафта давомида жуда қаттиқ меҳнат қилдик, аммо тўпиғим тикланиши учун кўпроқ вақт керак. Йирик турнирда терма жамоа сафида ўйнаш, тўқ сариқ рангли формамизда майдонга тушиш, бутун мамлакат қўллаб-қувватлашини ҳис қилиш – орзу. Лекин энди мен ҳам барча мухлисларимиз каби жамоага ташқаридан ёрдам бериб бораман. Давом этинг, йигитлар! – деб ёзди де Йонг ижтимоий тармоқларида.

Евро-2024 14 июндан 14 июлга қадар Германияда бўлиб ўтади. Қуръа натижаларига кўра Нидерландия терма жамоаси Польша, Австрия ва Франция билан бирга “D” гуруҳидан жой олди.