Bekobodning “Metallurg” jamoasi chernogoriyalik hujumchisi Boban Jorjevich bilan ikki tomonlama kelishuvga ko‘ra shartnomani bekor qildi.

Boban Jorjevich 2024 yilgi mavsum boshida "Metallurg" tarkibiga kelib qo‘shilgan edi. Murabbiylar shtabi unga Superliganing 9 ta uchrashuvida maydonga tushish imkoniyatini berdi. Shulardan 4 tasini boshlang‘ich tarkibda, 5 tasini esa zahiradan o‘yinga qo‘shilish tarzida taqdim etishdi.

Boban Jorjevich “Metallurg” tarkibidagi 388 daqiqalik faoliyati davomida bitta gollik uzatmani amalga oshirdi. 1-turda “Lokomotiv”ga qarshi o‘yinda Abror Toshqo‘ziyev goliga assistentlik qildi. 2 marta sariq kartochka bilan "siylandi".

O‘zbekiston kubogining 1-bosqich guruh o‘yinlarining barchasida boshlang‘ich tarkibda maydonga tushdi, 268 daqiqa to‘p surdi, 1 ta o‘yinda zahiraga olindi. 1 ta gol urdi, 1 ta gollik uzatmani amalga oshirdi.

“Metallurg” futbol klubi Boban Jorjevichga Bekoboddagi faoliyati uchun minnatdorlik bildiradi va uning kelgusi faoliyatiga omad tilaydi" - deyiladi bekobodliklarning rasmiy sahifasida.