Бекободнинг “Металлург” жамоаси черногориялик ҳужумчиси Бобан Жоржевич билан икки томонлама келишувга кўра шартномани бекор қилди.

Бобан Жоржевич 2024 йилги мавсум бошида "Металлург" таркибига келиб қўшилган эди. Мураббийлар штаби унга Суперлиганинг 9 та учрашувида майдонга тушиш имкониятини берди. Шулардан 4 тасини бошланғич таркибда, 5 тасини эса заҳирадан ўйинга қўшилиш тарзида тақдим этишди.

Бобан Жоржевич “Металлург” таркибидаги 388 дақиқалик фаолияти давомида битта голлик узатмани амалга оширди. 1-турда “Локомотив”га қарши ўйинда Аброр Тошқўзиев голига ассистентлик қилди. 2 марта сариқ карточка билан "сийланди".

Ўзбекистон кубогининг 1-босқич гуруҳ ўйинларининг барчасида бошланғич таркибда майдонга тушди, 268 дақиқа тўп сурди, 1 та ўйинда заҳирага олинди. 1 та гол урди, 1 та голлик узатмани амалга оширди.

“Металлург” футбол клуби Бобан Жоржевичга Бекободдаги фаолияти учун миннатдорлик билдиради ва унинг келгуси фаолиятига омад тилайди" - дейилади бекободликларнинг расмий саҳифасида.