Chernogoriyalik mutaxassislar iste’fo bergach “Metallurg” futbol klubini keyingi bahslarga katta murabbiy Ilyos Qurbonov tayyorlaydigan bo‘ldi. Klub rahbariyati jamoaga kim bosh murabbiy bo‘lishi borasida tez orada bir to‘xtamga keladi.
Ilyos Qurbonov Toshkent viloyati futboli tarbiyalanuvchisi sanaladi. Futbolchi sifatida professional faoliyatini Angrenning “Semurg‘” jamoasida boshlagan. Keyinchalik oliy liganing “Buxoro”, “Nasaf”, “Dinamo”, “Metallurg” jamoalarida to‘p surdi. Futbolchilik faoliyatini Jizzaxning “So‘g‘diyona” futbol klubida yakunladi.
Ilyos Qurbonov O‘zbekiston chempionatida 320 ta uchrashuvda maydonga chiqqan va raqiblari darvozasiga 72 ta to‘p kiritgan. O‘zbekiston terma jamoasiga chaqirilgan va bitta o‘yinda maydonga tushgan.
2015 yildan murabbiylik sohasiga o‘tgan Ilyos Qurbonov qadrdon klubi – “Metallurg”da turli lavozimlarda ishlab kelmoqda. Avvaliga yoshlar jamoasida murabbiy, bosh murabbiy vazifalarida faoliyat olib borgan Ilyos Qurbonov 2023 yildan klubning asosiy tarkibida katta murabbiy sifatida faoliyat olib bormoqda.
