Livan milliy jamoasi JCH-2026 saralashi uchinchi bosqichiga chiqish yo‘lida qattiq kurash olib bordi.
Biroq livanliklar yakunda «I» kvartetida Avstraliya va Falastin termalaridan keyin 3-o‘rin bilan cheklanishdi va navbatdagi mundialga borishdan umid uzishdi. Vaholanki, mamlakatda kuzatilayotgan iqtisodiy va siyosiy muammolarga qaramay, muxlislar jamoa sardori Hasan Matukning ajoyib xalqaro faoliyati yorqin g‘alaba va uchinchi raund yo‘llanmasining qo‘lga kiritilishi bilan xotima topishidan umidvor edilar. Ha, Livan futboli afsonasi milliy jamoa safidagi oxirgi o‘yinida Bangladesh termasi darvozasiga 3ta gol urdi, ammo 4:0 hisobli g‘alaba guruhda 2-pog‘onaga ko‘tarilish uchun kamlik qildi. Livanliklar aslida imkoniyatni Falastin termasiga qarshi bahs (0:0)da qo‘ldan chiqarishgandi. Agar ular 5-tur bahsida g‘alaba qozonishganida, marraga yetishardi, biroq... Matukning o‘zi shu o‘yinlardan oldin FIFA rasmiy saytiga intervyu berib, jamoaning saralash dovonidagi istiqbolini chamalagan va o‘yin sifati pasaygani sababiga to‘xtalgandi. U shuning barobarida Bangladesh termasiga qarshi o‘yin o‘zi uchun xalqaro darajadagi oxirgisi bo‘lishini yashirmagandi.
- Mana, JCH-2026 saralashi ikkinchi raundi eng muhim pallaga yetdi, Livan termasi holati esa uncha yaxshi emas. Bunday vaziyatda jamoaning ruhiyati qanday? Umuman, hal qiluvchi bahslarga tayyorgarlik jarayoni to‘g‘ri ketyaptimi?
- Tushunarliki, Falastin termasiga qarshi o‘yinimiz o‘ta muhim. Unda g‘alaba qozonishimiz shart, hozir butun e’tiborni shu uchrashuvga qaratganmiz. Navbatdagi bosqichga chiqish imkoni yo‘q emas ekan, bor kuchimizni sarflashga harakat qilamiz. Asosiysi, taqdirimiz hamon o‘z qo‘limizda, bu jamoamizga yaxshigina motivasiya beradi. Falastin milliy jamoasi sezilarli darajada kuchaygan bo‘lsa-da, bu raqibni yenga olishimizga ishonaman. Umuman, har qanday arab jamoasi bilan o‘yinda imkoniyatimiz hamisha 50ga 50 ko‘rinishida bo‘ladi. Xullas, yechim bitta - mundial yo‘llanmasi uchun kurashda qolish uchun Falastin termasini mag‘lub etishimiz shart.
- Saralashning birinchi davrasida ham Falastin, ham Bangladesh termasiga qarshi kechgan o‘yinlarda qatnashgandingiz. Raqiblarning ayni holati xususida nima deya olasiz?
- Falastinliklarga qarshi birinchi o‘yinimiz juda og‘ir kechgan va yakunda durang natija bilan cheklangan edik. Yodimda, kerakli darajada o‘ynay olmagan, falastinliklar esa har tomonlama faol to‘p surishgandi. Ular Osiyo kubogida ham chakki taassurot qoldirishgani yo‘q va turnirdan keyin ishlar ko‘lamini yanada kengaytirishdi. Deylik, jamoa tarkibini boshqa mamlakatlarda yashaydigan falastinlik futbolchilar bilan kuchaytirish siyosatini davom ettirishdi. Falastin termasidagi taraqqiyotni nazarda tutsak, bo‘lajak uchrashuv yanada murakkab tus olishi tayin. Albatta, o‘yinning har bir detalini sozlash yo‘lida murabbiylar bilan ko‘p ishladik, chunki natija naqadar muhim ekanligini barchamiz tushunib turibmiz.
- Miodrag Radulovich OK-2023 arafasida bosh murabbiy lavozimiga qaytarildi. Sizningcha, bu qadam jamoa foydasiga ishladimi yoki...? Umuman, 2015-2019 yillar oralig‘ida Livan termasini boshqargan murabbiy qanchalik o‘zgaribdi? Jamoada o‘sish kuzatildimi?
- Radulovichning qaytishi biz - futbolchilar uchun juda muhim edi. Binobarin, Osiyo kubogi boshlanishidan oldin o‘zimiz yaxshi biladigan murabbiy qo‘l ostida ishlashni xohlagandik. Har holda, Miodrag ham Livan futboli nyuanslarini tushunadi, nomzod yigitlarni yaxshi biladi. Yana bir tomoni, u bunga qadar 4 yil davomida juda samarali ish olib borgandi. Qolaversa, shundan so‘ng o‘z vataniga qaytib, Chernogoriya termasini ham yaxshi boshqardi, ijobiy natijalar qayd etdi. Xullas, Radulovichning qaytgani jamoamizga ijobiy turt-ki bergani - ayni haqiqat.
- Oxirgi qit’a kubogida «pley-off»ga chiqish imkoniyatini hosil qildinglar, ammo guruh bosqichi so‘nggi o‘yinida Tojikiston termasiga 1:2 hisobida yutqazib qo‘ydinglar. Ushbu mag‘lubiyatdan keyin jamoa muhitida nimalar ro‘y berdi?
- Albatta, juda og‘riqli mag‘lubiyat, axir «pley-off» chiptasi shundoq qo‘limizda turgandi. Boz ustiga, 1:0 hisobida oldinda borgan vaqt ikkinchi golni urishga ham yaqin keldik. Biroq qizil kartochka jamoaga aks ta’sir ko‘rsatdi, o‘yinimizni mutlaqo buzib yubordi. To‘g‘ri, shunda ham iloji boricha qattiq himoyalanishga urindik, ammo 10 kishi bo‘lib o‘ynash oson emasdi. Bu - og‘riqli tajriba. Oxir-oqibat, mag‘lubiyatni to‘g‘ri qabul qildik, chunki Qatarda keyingi bosqichga chiqolmagan bo‘lsakda, bor kuchimizni berdik, bundan qoniqish hissi uyg‘ondi.
- Ha, OK-2023da Livan termasining natijasi o‘xshamadi, lekin yaxshi o‘yini ijobiy taassurot qoldirdi. JCH-2026 saralashida esa o‘sha jonli o‘yindan asar ham ko‘zga tashlangani yo‘q. Jamoa sifat bo‘yicha keskin orqaga ketganini nima bilan izohlaysiz?
- Menimcha, murabbiyning o‘zgarishi ta’sir qildi. Qachonki, barqarorlik ta’minlanmasa, jamoada katta muammolar tug‘iladi. Falastin termasiga qarshi birinchi o‘yinimizda 2 ochko yo‘qotdik, avstraliyaliklar bilan bo‘lgan keyingi bahsda esa ijobiy natija qayd etish imkoni past edi, ammo 0:5 hisobi yigitlarga og‘ir botdi, baribir. Lekin hozir ortda qolgan o‘yinlarni o‘ylab, afsuslanadigan vaqt emas, yaxshisi, Falastin va Bangladesh termalariga qarshi bo‘lajak bahslarga e’tibor qaratgan ma’qul. Takrorlayman, jamoamizda imkoniyat bor ekan, aslo bo‘shashmaymiz. Agar falastinliklarni yengish missiyasini uddalasak, keyingi bosqichga yo‘l olish imkoniyati o‘z-o‘zidan oshib ketadi.
- Livan futbolining chin afsonasi sanalasiz. Deylik, milliy jamoa libosidagi o‘yinlar va gollar soni bo‘yicha rekordchi bo‘lib turibsiz. Xo‘sh, xalqaro maydondagi natijalaringizdan nechog‘li mamnunsiz? Aytishlaricha, JCH saralashidan so‘ng milliy jamoadagi faoliyatingizga nuqta qo‘yishni rejalashtirayotgan ekansiz...
- O‘z mamlakati sharafini himoya qilish - bu futbolchi uchun alohida yutuq. Men esa naq 18 yil davomida Livan bayrog‘i ostida o‘ynadim. Shunday ekan, xalqaro faoliyatim bilan bemalol faxrlanishim mumkin. O‘z navbatida, Livan futbol assosiasiyasiga o‘z mamlakatim sharafini himoya qilish imkoniyatini bergani uchun minnatdorchilik bildiraman. Jamoani boshqargan barcha murabbiylarga ham rahmat. O‘yinlar va gollar soni bo‘yicha Livan termasi rekordchisi ekanligim o‘z yo‘liga, asosiysi, jamoa uchun hamisha borimni berdim. Kelajak uchun hali qandaydir rejalar tuzganimcha yo‘q, ammo bangladeshliklar bilan o‘yin men uchun milliy jamoa libosidagi oxirgisi bo‘ladi.
- Terma jamoaga bog‘liq qaysi lahzalar xotirangizga muhrlandi, o‘zingizga yoqadigan muayyan o‘yin ham bormi?
- 2012-2016 yillar oralig‘ida eng yaxshi davrni boshdan kechirdik. O‘sha vaqt jamoada yoshlik shijoati va tajriba ajoyib tarzda uyg‘unlashgandi. Livan futbol assosiasiyasi ham zo‘r qo‘llab-quvvatlab turdi. Shunga yarasha, yaxshi natijalarga erishdik, deylik, JCH saralashining yakuniy bosqichida o‘ynadik.
- 48ta jamoadan iborat JCHning yangi formati haqida qanday fikrdasiz? Sizningcha, OFK uchun 8,5ta yo‘llanma ajratilgani kelajakda Livan futboliga ham foyda berarmikan?
- Albatta, JCHda ishtirok etadigan jamoalar sonining ortishi yaxshi. Bu nisbatan kuchsiz jamoalarga ko‘proq imkoniyat yaratadi, joylarda mundialga borish ishonchini oshiradi. To‘g‘ri, OFK miqyosida Eron, Yaponiya va J.Koreya termalari hamisha saralash jarayoni favoritlari sanaladi. Saudiya Arabistonida ham mahalliy liga rivojlantirilmoqda, buyuk futbolchilar va murabbiylarning mamlakatda faoliyat yuritishlari milliy jamoani yuqori darajaga olib chiqishda qo‘l keladi. Qolgan yo‘llanmalar uchun esa xohlagan jamoa kurash olib borishi mumkin.
M.PO‘LATOV tayyorladi
