20 iyun kuni Chirchiq shahrida start olgan o‘smirlar (U-17) o‘rtasidagi Markaziy Osiyo chempionati bugun o‘z yakuniga yetdi.

Mintaqaning eng kuchli 100 nafardan ortiq polvonlari ishtirok etgan bu galgi musobaqa qizg‘in va murosasiz kurashlarga boy bo‘ldi.

Yakuniy natijalarga ko‘ra, O‘zbekiston terma jamoasi a’zolari ushbu musobaqada 22 ta oltin, 16 ta kumush va 7 ta bronza, jami 45 ta medal jamg‘argan holda umumjamoa hisobida birinchi o‘rinni egallashdi.

Hisobida 9 ta oltin, 4 ta kumush va 3 ta bronza, jami 16 ta medal bo‘lgan Turkiya terma jamoasi esa ikkinchi o‘rinni band etdi.

8 ta oltin 1 ta kumush va 2 ta bronza jamg‘argan qo‘shni Qozog‘iston terma jamoasi esa umumjamoa hisobida kuchli uchlikka yakun yasab berdi.

Bundan tashqari, musobaqada qatnashgan Qirg‘iziston 34 ta (3 ta oltin, 10 ta kumush va 21 ta bronza), Turkmaniston 13 ta (11 ta kumush, 2 ta bronza) va Tojikiston terma jamoasi a’zolari 7 ta (7 ta bronza) medal qo‘lga kiritdi.

Ta’kidlash kerakki, Markaziy Osiyo chempionatining bu galgi mukofot jamg‘armasi 16 ming AQSH dollarini tashkil etdi va sovrindorlar mos ravishda 500 (oltin medal), 300 (kumush medal) va 200 (bronza medal) AQSH dollari miqdorida mukofot bilan taqdirlandi.

O‘g‘il bolalar orasida o‘zbekistonlik Nodir Jo‘rayev, qiz bolalar orasida esa qozog‘istonlik Kseniya Pozorova musobaqaning eng yaxshi sportchisi deb topildi.