Superliga 13-turidan o‘rin olgan "Olimpik" – "Surxon" (2:0) uchrashuvidan so‘ng mehmonlar bosh murabbiyi Fevzi Davletov o‘z fikrlarini bildirib o‘tdi.

"O‘yin qizil kartochkagacha boshqacha, undan keyin umuman boshqacha ko‘rinish oldi. Negadir, bir kishi kam bo‘lib qolgunga qadar jamoa biroz ishtiyoqsiz ko‘rindi, ammo qizil kartochkadan so‘ng faollikni oshirdik. Mo‘’jiza sodir bo‘lmadi. O‘tgan o‘yinda bir ammalagan edik, ammo bu safar o‘xshamadi. Intizomsizligimiz pand berdi. O‘zimiz aybdormiz. Barchasini to‘g‘rilashimiz kerak. Muxlislar oldida ko‘rsatgan futbolimiz uchun uzr so‘rayman. Agar ikkinchi chetlatish bo‘lmaganida, gol ham urgan va o‘yinni qutqarib qolgan bo‘lar edik.

O‘ylashimcha, Haydarov ikkinchi o‘yinda ham qo‘shilib ketishda muammolarga duch keldi. Vaholanki, vaziyatlar yaratdi. Ishlashi kerak bo‘lgan narsalar ko‘p. Umid qilamanki, kelajakda yanada o‘sadi. Unda o‘zini namoyish etish uchun barcha imkoniyatlar mavjud", — dedi Davletov.