"Superliga 13-tur bahslari doirasida bo‘lib o‘tgan "vodiy derbisi" "Andijon"-"Navbahor" uchrashuvidan so‘ng mezbonlarning umidli futbolchisi 20 yoshli Rustam Turdimurodovni suhbatga tortdik.
- Avvalo derbidagi g‘alaba bilan tabriklaymiz! O‘yin haqidagi fikrlaringiz bilan o‘rtoqlashsangiz?
- "Navbahor" ga qarshi o‘yin qiyin bo‘lishini bilardik. Bu chempionatda shu kungacha o‘tkazgan eng qiyin o‘yinimiz bo‘ldi desam mubolag‘a bo‘lmaydi. Mazkur uchrashuv birinchi davraning so‘nggi uchrashuvi bo‘lgani bois, yozgi tanaffusga g‘alaba bilan chiqib ketish maqsadimiz bor edi. Shukrki buni uddaladik.
- "Andijon" birinchi goldan so‘ng himoyaga ko‘proq e’tibor qarata boshladi. Ammo yakunda hisob baribir yirik ko‘rinishga keldi...
- Albatta, tanaffus paytida murabbiylarimiz hisobni ushlashga va gol o‘tkazmaslikka harakat qilishimiz kerakligini uqtirishdi. Ko‘rib turganingizdek, jamoaviy mehnat evaziga ajoyib g‘alabani qo‘lga kiritdik.
- O‘zi aslida "Navbahor" ga qarshi uchrashuvga qanday tayyorgarlik ko‘rildi? Kuchli raqibga qarshi bahs oldidan nimalarga e’tibor qaratildi?
- "Dinamo"ga qarshi uchrashuvdan so‘ng mazkur bellashuvga tayyorgarlik ko‘rish uchun bizda u qadar ko‘p vaqt bo‘lmadi. Ammo bo‘lajak o‘yinga maksimal tayyorgarlik ko‘rish uchun harakat qildik. Albatta, "Navbahor" kuchli jamoa ularni mag‘lub eta olganimizdan hursandmiz…
