Ispaniya terma jamoasi bosh murabbiyi Luis de la Fuente Germaniyaga qarshi bo‘lib o‘tgan o‘yin borasida o‘z fikrini bildirib o‘tdi. Murabbiyning fikricha, Pedriga qarshi fol ishlatgan Toni Kroos maydondan chetlatilishi kerak edi.

Mazkur qoidabuzarlik natijasida Pedri jarohat oldi va maydonni erta tark etdi. Hakam Entoni Teylor esa germaniyalik futbolchiga na sariq kartochka, na qizil kartochka berdi.

«Pedri juda kuchli zarba qabul qildi. Ushbu fol uchun o‘yinchini jazolash kerak edi. Pedri musobaqa davomida madyonga tusha olmasa, men bunga bahona sifatida qaramayman. Uning o‘rniga boshqa o‘yinchi tushadi. Ixtiyorimizda 26 o‘yinchi bor.

Pedri kuchli og‘riqni his qildi. O‘ylashimcha, bu qoidabuzarlik qizil kartochkaga tortardi. Pedri maydonda bo‘lmasa ham terma jamoaga foyda keltirishda davom etadi.

Bunday bahslarda o‘rtaga ko‘p narsaga qo‘yilgan bo‘ladi va barcha imkoniyatlardan foydalanish kerak. Germaniyaga hech qanday e’tirozim yo‘q», – dedi Luis de la Fuente.