Испания терма жамоаси бош мураббийи Луис де ла Фуэнте Германияга қарши бўлиб ўтган ўйин борасида ўз фикрини билдириб ўтди. Мураббийнинг фикрича, Педрига қарши фол ишлатган Тони Кроос майдондан четлатилиши керак эди.

Мазкур қоидабузарлик натижасида Педри жароҳат олди ва майдонни эрта тарк этди. Ҳакам Энтони Тэйлор эса германиялик футболчига на сариқ карточка, на қизил карточка берди.

«Педри жуда кучли зарба қабул қилди. Ушбу фол учун ўйинчини жазолаш керак эди. Педри мусобақа давомида мадйонга туша олмаса, мен бунга баҳона сифатида қарамайман. Унинг ўрнига бошқа ўйинчи тушади. Ихтиёримизда 26 ўйинчи бор.

Педри кучли оғриқни ҳис қилди. Ўйлашимча, бу қоидабузарлик қизил карточкага тортарди. Педри майдонда бўлмаса ҳам терма жамоага фойда келтиришда давом этади.

Бундай баҳсларда ўртага кўп нарсага қўйилган бўлади ва барча имкониятлардан фойдаланиш керак. Германияга ҳеч қандай эътирозим йўқ», – деди Луис де ла Фуэнте.