Kolumbiya terma jamoasi Amerika kubogi yarim finalida Urugvayni mag‘lub etib (1:0) mag‘lubiyatsiz seriyasini uzaytirdi.
Uchrashuv taqdirini 39-daqiqada urilgan Jefferson Lermaning goli hal qildi. Tanaffusga yaqin kolumbiyaliklar maydonda bir kishi kam bo‘lib qolishdi, ammo bu ularning g‘alabani saqlab qolishlariga to‘sqinlik qilmadi. Squawka xabariga ko‘ra, Kolumbiya terma jamoasi ketma-ket 28 uchrashuvda mag‘lub bo‘lmayapti (6 durang va 22 g‘alaba) - shaxsiy rekord. Jamoaning so‘nggi mag‘lubiyati 2022 yilning fevraliga to‘g‘ri keladi - Argentinadan qabul qilingan mag‘lubiyat.
Aynan "Albiseleste" kolumbiyaliklarning Amerika kubogi finalidagi raqibi bo‘ladi. Uchrashuv 15 iyul kuni Toshkent vaqti bilan 05:00 da bo‘lib o‘tadi.
