Davralar oralig‘idagi tanaffus davrida “Metallurg” tarkibida o‘zgarishlar davom etmoqda. Kecha jamoa ikki nafar o‘yinchi bilan shartnomani bekor qildi. Bular markaziy himoyachi Abbosjon Otaxonov hamda yarim himoyachi Sardor Abduraimovlardir.

28 yoshli Abbos Otaxonov faoliyatini Tailandda davom ettirishi bois klub bilan xayrlashdi. U “Metallurg” tarkibida 2018-2020, 2022 hamda 2024 yillar davomida 95 ta o‘yinda maydonga chiqqan. 3 ta gol kiritgan. 19 marta ogohlantirilgan. O‘zbekiston kubogi bahslarida 10 ta o‘yinda maydonga chiqib, 2 ta gol urdi. 3 marta sariq kartochka bilan jazolandi.

Sardor Abduraimov esa 2023 yilning ikkinchi yarmidan “Metallurg” sharafini himoya etib keldi. Bekobodliklar safidagi bir yillik faoliyati davomida Abduraimov 26 ta uchrashuvda maydonga tushdi. 1 ta gol urdi. 2 marta sariq kartochka bilan jazolandi. O‘zbekiston kubogi bahslarida esa 4 ta o‘yinda to‘p surdi. 2 ta gol kiritdi.